Sa makusog na pagkakasarayo san mga empleyado san munisipyo nan sa pag-endorsar ni Mayor Lil B. Gonzales na pamahalaan an mga aktibidad niyan na kapiyestahan ni Senyor San Miguel de Arkanghel niyan na bulan san Setyembre 2009, pinamunuan ni Adonis Fortes bilang Presidente san Irosin Local Government Employees Association (ILEA) an matrayumpo na selebrasyon. Kabilang sa mga aktibidad na orog na pinagayon an Paray Festival Street Presentation kon diin nanggana an Gallanosa National High School na mao man an marepresentar sa Kasanggayahan Festival sa Oktubre.. Sa Drum and Lyre Competition High School level, nanguna man an Holy Spirit Academy san Irosin, sa Elementary level, an Irosin Central School.

Sa kinundokta na Replication and Inception Workshop (RIW) sa Gubat, Sorsogon san Hunyo 25-27, 2009 aktibo na iniristoryahan san may 23 na mga partisipantes hali sa munisipyo san Irosin sa pamumuno ni Mayor Lil B. Gonzales an pagiging modelo san Irosin sa tama na pagprotehir san kapalibutan partikular sa pagmanehar san mga basura sa bongto. Pinasilidad ini san DILG RO V sa pamumuno ni Emce Santiago, an GO-FAR Coordinator sa rehiyon nan sa mayad na pakikipagkoordinar ni MLGOO Felix Cal-Ortiz. An basehan san kinunduser na pagtiripon, an pagdeklara san Department of the Interior and Local Government nan paghatag awards sa munisipyo bilang sayo na lugar na puwede irogon an mga tama nan dianis na proseso sa pagmanehar san basura nan san iba-iba na integrasyon sin mga proyekto sa lugar sin tapukan (dumpsite).